15 нче февраль герой-шагыйрь Муса Җәлилнең туган көне! Әлеге исем халкыбызның күңеленә тирән уелган исемнәрнең берсе. Муса Җәлил – татар халкының бөек шагыйре, Советлар Союзы Герое, татар халкының горурлыгы, каһарман шагыйре. Ул 1906 нчы елның 15 нче февралендә Оренбург губернасы Мостафа авылының матур бер гаиләсендә алтынчы бала булып дөньяга килә. Муса Җәлил - балалар өчен дә, өлкәннәр өчен дә бик күп әсәрләр иҗат иткән шәхес. Без аның әсәрләрен бик яратып укыйбыз. Аның шигырьләре дус, бердәм, тугырылыклы, намуслы булырга өйрәтә, үз өстеңә алган вазыйфаларны төгәл үтәргә өнди. Мәктәбебездә эшләп килүче, Ибрагимова А.Н. җитәкләгән "Күңелле сәхнә" театр түгәрәгенә йөрүче укучыларыбыз, яраткан шагыйребезнең "Кызыл ромашка" шигырен сәхнәләштерделәр. Укучыларыбызның чыгышы бик матур килеп чыкты, һәрберсе рольләрне бик оста башкардылар. Афәрин, укучыларыбыз! Муса Җәлил – безнең тыныч тормышыбыз хакына башын салган бик күп батырларның берсе. Без туган җиребезне яклап сугышка кергән һәм яшьли һәлак булган каһарманнарны онытмыйбыз, хәтерлибез! Мондый фаҗига башка беркайчан да кабатланмасын! Күкләребез тыныч, тормышыбыз матур, дөньялар имин булсын!