Бүген, 5 декабрьдә Кәрим Тинчурин исемендәге Татар дәүләт драма һәм комедия театрында «Сәйяр»балалар һәм яшүсмерләр театрлары фестивале җиңүчеләрен бүләкләү тантанасы булды.

Фестиваль Татарстан Республикасы Мәгариф һәм фән Министрлыгы, «Сәхнә» һәм «Салават күпере» журналлары, «Татмедиа» акционерлык җәмгыяте тарафыннан балаларда рухи мәдәният һәм татар халкының милли мирасына сакчыл караш формалаштыру максатыннан оештырыла.

Быел фестивальдә Татарстанның мәктәпкәчә һәм гомуми белем бирү учреждениеләренең 246 балалар театр коллективы катнашты, алар арасында безнең 5нче номерлы "Бэлэкэч" Саба балалар бакчасы да бар. Тәрбияче Заһидуллина Л.Х. һәм музыка җитәкчесе Сафина Г. Р. җитәкчелегендәге 2нче өлкән төркем тәрбияләнүчеләре А. Енииканың «Матурлык» хикәясе мотивлары буенча театраль куелыш тәкъдим иттеләр.

Нәни артистларыбызның иҗади чыгышларын Казан дәүләт театрларының профессиональ артистларыннан һәм мәдәният өлкәсендәге экспертлардан торган компетентлы жюри бәяләде.

Безнең балалар бакчасы коллективы «Өмет киләчәк» номинациясендә призер булды, Диплом һәм акчалата сертификатка лаек булды.

Яшь артистларыбызга уңышлар һәм яңа җиңүләр телибез!