Менә җәй җитте. Мәктәпләрдә укулар тәмамланды. Көннәр озыная, төннәр кыскара. Кояш елмая. Бал кортлары чәчәчкләрдән бал җыялар. Төрле күбәләкләр шул чәчәкләргә куналар. Урманда, болында кошлар сайрый. Табигать матурлана. Балаларның көтеп алган җәйге каникуллары башланды. Алар җәйне бик яраталар, чөнки җәен алар ял итәләр, мәктәп каршында эшләүче лагерьларга йөриләр.
Эзмә урта мәктәбе каршында оешкан "Дуслык" ял һәм сәләмәтләндерү лагерендә 80 бала, ә "Кырмыска" ял һәм хезмәт лагерендә 8 бала ял итәчәк. Лагерьдә балаларның һәр иртәсе линейка үкәрү һәм зарядка ясау белән башлана. Аннан соң аларны ашханәдә иртәнге кайнар аш көтә. Ашаганнан соң, һава торышына карап, балалар төрле уеннар, мавыктыргыч чараларда катнашалар.
Бүген, 1 июнь мәктәп яны лагерының 1нче көне. Тәмле иртәнге аштан соң балалар "Уңай мөхит" операциясендә катнаштылар. Һәр отряд үз кабинетын бизәде. Отрядларга исемнәр, девиз һәм җырлар сайланып стенгазеталар чыгарылды. Куркынычсызлык кагыйдәләрен искә төшереп инструктажлар үткәрелде. Аннары Балаларны яклау көненә багышланган "Алтын балачак" дип аталган күңел ачу чарасы уздырылды. Туклыклы төшке аштан соң балалар лагерь ачылышына әзерлек эшләрен башладылар. Шулай ук балалар өчен "Мы за безопасность на дорогах" дигән рәсем конкурсы оештырылды. Ахырдан отрядларда "шәмчекләр" уздырылды. Укучылар үзләренең фикерләре һәм лагерьның беренче көндә булган хисләре белән уртаклаштылар, алдагы көнгә планнар кордылар.