Китап уку – кешелекнең иң күркәм шөгыле. Китап кешеләрдә матур тойгылар уята, фикерләү сәләтен үстерә, төрле чорлардагы вакыйгалар белән таныштыра. Күз алдына китерегез: барлык булган китаплар юкка чыкса, аннан соң тормыш нинди булыр икән? Әйе, тормышыбыз күген яктыртучы кояшның бер нуры югалган кебек булыр иде безгә. Китаплар кешегә буыннан-буынга тәҗрибә өйрәтәләр, белем бирәләр, матурлыкны тоярга, кешеләрнең күңелен аңларга ярдәм итәләр. Шуңа күрә дә, ХАЛЫКАРА БАЛАЛАР КИТАПЛАРЫ КӨНЕ безнең күңелләргә бик якын булып кала. Бүген, балалар белән без рәхәтләнеп белем иленә, әкиятләр дөньясына алып керүче китаплар турында көн дәвамында төрле –төрле чаралар үткәрдек. Бердәм белем эшчәнлекләрендә дә китапларга таянып темаларны аңлаттык, шөгыльләр арасында кызыклы яңа китаплар белән таныштык. Мәктәпкә әзерлек төркеме, мәсәлән, бик теләп тагын бер кат китапларын «ремонтладылар» тузган битләрен ябыштырдылар, зурлар яраткан әкиятләрен укыдылар, нәниләр китапны саклап кына укырга кирәклеге хакында белделәр. Әлбәттә, китапларга игътибар бер көндә генә түгел, ә ел дәвамында, даими һәр көнне бара.Һәр төркемдә балалар өчен оештырылган махсус китап почмаклары китап-журналлар белән яңартылып тора. Балалар үзләре дә бу почмакка вакытлыча яраткан әкиятләрен алып килеп торалар һәм бик яратып кызыклы, мавыктыргыч «илләргә» сәяхәтләр ясыйлар.