Китап — иң акыллы киңәшчеләрнең берсе. Китап һәр кешегә хезмәттә булыша, ул кешеләрне бәладән коткара, тормышны танып белергә өйрәтә. Китап кешегә үсәргә һәм халыкның аңын баетырга мөмкинлек бирә. «Китап кешене галәмнең хуҗасы итә», — ди П.А. Павленко.
Бала чакта китап укудан да күңелле нәрсә юктыр. Бигрәк тә ул китапта сиңа таныш хәлләр турында язылган булса, аны кат-кат укыйсы, алар турында иптәшләреңә сөйлисе, шигырьләрен күңелдән ятлыйсы килә. Андый китаплар — безне бала чактан зур тормышка озатып калучы, гомер буе хәтердә яңарып торучы иң якын дусларыбыз, һәр кеше китапны үзенең иң якын дусты итеп күрә. Китап — канатлы ул!

Әлеге фикерне, китапка карата ихтирамны без балаларга даими төшендерергә тырышабыз. Ләкин бу атнада барлык эшчәнлегебез аеруча  китапка багышланды. Төрле милләт әкиятләренә багышланган күргәзмәләр, аппликация, рәсем ысуллары белән китап тышлыклары ясау балаларда китапка карата кызыксыну уяткандыр дип уйлыйбыз. Зурлар һәм мәктәпкә әзерлек төркемнәре Ә.Каримуллин исемендәге район үзәк китапханәсенә экскурсиягә бардылар. Китапларның күплеге, аларның сакланышы балаларны бик кызыксындырды. Аеруча Саба төбәге язучыларына багышланган бүлек истә калды аларга. Кайберләре: "Мин дә үскәч язучы булырга хыялланам", - дип кайтты китапханәдән балаларыбыз.