"Туган Татарстаным.Яшеллеккә күмелгән туган илем" атнасы кысаларында, балаларның туган ил турында белемнәрен киңәйтү, туып үскән җиргә мәхәббәт тәрбияләү  максатыннан, атна дәвамында герб, флаг, гимн төшенчәләре белән таныштык. Рәсемнәр буядык, җырлар, шигырьләр өйрәндек.

Бакчабызга йөрүче балалар, тәрбиячеләре белән берлектә, ындыр табагына сәяхәт кылдылар. Сәяхәт дәверендә ашлык, аның төрләре, ашлык эшкәртүче техникалар белән таныштылар. Үзләре яратып ашый торган ипинең, нинди зур юллар үтеп барлыкка килүе белән таныштылар.

Ипи басуда үсә,

Аннан амбарга күчә,

Аннары мичтә пешә,

Кызарып мичтән төшә.

"Икмәк яшәү терәге" атнасы кысаларында балалар икмәк ,аның барлыкка килүе белән таныштылар. Балаларда көзге байлыкның халыкка шатлык, куаныч китерүен төшендерелде, бу байлыкларны тудыручы игенчеләр хезмәтенә карата хөрмәт тәрбияләнде.

"Икмәк яшәү терәге" атнасы кысаларында, балалар тәрбиячеләре Диләрә Фоат кызы ярдәме белән печенье пешерү серләренә өйрәнделәр. Камыр басып, төрле формалар ярдәмендә фигуралар ясап,печенье пешерделәр.

Бакчабызда йөрүче балалар белән "Көзге кросс 2022" ярышын билгеләп үттек. Балалар ярыша-ярыша йөгерделәр, көчләрен сынадылар, сәламәтлекләрен ныгыттылар.

Бакчабызга йөрүче балалар белән  симметрияле формалар кисүнең яңа ысулы белән таныштык,эшләү барышында төрле материалларны яраштыру күнекмәсен ныгыттык.Балаларда  вазаны ясау дәверендә көзге төсләр гүзәллеген күреп соклану хисләре тәрбияләнде

Бакчабызга кунакка килгән "аю" көз күчтәнәчләре алып килгән иде. Балалар яшелчәләр белән якыннанрак таныштылар, табышмакларга җаваплар эзләделәр,шигырьләр тыңладылар.

Рәсем дәресендә татар халкының милли баш киеме түбәтәй белән таныштык. Балалар яратып җырлый торган "Кәләпуш" җырын җырладык. Балалар үзләре сайлаган төсләр белән түбәтәй рәсемен буядылар.

Бакчабызга йөрүче балалар белән көз темасына чәчәкләр, яфраклар, миләш җимешләрен кулланып аппликация эшләдек. Эш барышында җимеш бирүче агачлар белән таныштык.

1 сентябрь- Белем бәйрәме. Бу бәйрәм балачак хәтирәсе булып һәрберебезнең күңел түрендә саклана торган көн ул. Иң матур кеше- белемгә омтылган кеше. Шуңа күрә һәрчак белемле булыйк, белемгә омтылыйк!