11 нче февраль көнне Шомырбаш төп гомумбелем мәктәбендә, Әфганстан иленнән совет гаскәрләрен чыгаруга 25 ел булуга карата кичә булып узды. Кичәгә, шул вакыйгаларда катнашкан, Таулар авылында яшәүче, Хөснуллин Хәниф Шәйхулла улы чакырылды. Кичәнең максаты:Әфган сугышы, аның асылы белән тирәнрәк таныштыру; Әфганстанда хәрби хезмәттә булган егетләргә карата хөрмәт хисләре тәрбияләү; укучыларга батырлык, героизм кебек хисләрнең югарылыгын күрсәтү; мондый сыйфатларны булдыруда үзтәрбиянең ролен аңлату иде. Кичә укучы балалар көче белән хәзерләнгән әдәби-музыкаль монтаж белән башланып китте. Шушы вакыйгаларга нигезләнгән видеоролик күрсәтелде. Аннары сүз килгән кунакка бирелде.Ул укучыларга армия сафларында үзенең хезмәт юлы турында таныштырды,  булачак солдатларга үзенең киңәшләрен бирде, алар өчен укуның  тормышта иң мөһим нәрсә икәнен искәртеп китте. Шушы сугышта ятып калаганнарны искә алып, бер минутлык тынлык игълан ителде. Ахырдан укучылар үзләренең кызыксындырган сорауларын бирделәр. Хезмәт иткән вакытта төшерелгән фото-альбом карадылар. Кичә бик эчтәлекле узды.