Бөек шагыйрь, публицист, язучы, тәрҗемәче Габдулла Тукайның туган көнендә «Адымнар» полилингваль комплексында «Халык горурлыгы - аның теле» дигән чара узды.
⠀
Бәйрәм Татарстан Республикасының эчке сәясәт мәсьәләләре буенча департаментның милли сәясәтен гамәлгә ашыру идарәсе башлыгы Д. М. Мостафинның сәламләү сүзе белән башланып китте.
⠀
Комплекс укучыларының вьетнам, төрек, корея телләрендәге шигырьләре, рус һәм татар телләрендә яңграган җырлар, ритмик биюләр чараның "бизәкләре" булды.
⠀
Фортепиано астында бөек Тукайның сүзләренә язылган «Тәфтиләү» җырын башкарган халыкара конкурслар лауреаты Г.Р.Мөхетдинованы тамашачылар аеруча җылы каршы алдылар.
⠀
11-нче музыка мәктәбенең укытучылары тарафыннан башкарылган Ф.Яруллинның “Шүрәле” балетыннан “Утлы сихерче бию” беркемне дә битараф калдырмады.
⠀
Чара татар, рус һәм инглиз телләрендә “Туган тел” җырын башкару белән тәмамланды.
⠀
Аны “Ләйсән” вокаль ансамбленең яшь җырчылары искиткеч гүзәл итеп башкарды.