Күренекле мәгърифәтче, гали К.Насыйри үзенең “Тәрбия китабы”нда болай дип язган: “Бер хаким балаларга шуйлә нәсихәт бирде ки : “Әй җаннарым, угланнарым, нәсихәтне ишетегез- һөнәр үгрәнегез. Дөньяның милкенә вә дәүләтенә ышанырга ярамас. Алтын- көмеш- сәфәр кешесенә хәтәрдер; вә йорт-җир кешесенә дәхи хәтәре бар: я угры алып китәр, яки утка янып китәр. Әмма һөнәр- бер агым судыр, вә ышанычлы дәүләтдер. Һөнәр иясе әгәр дәүләттән төшсә дә, кайгы юк. Имде, әй угыл, бу урында макскуд бер хикаять түгелдер. Син дә шулай ук һөнәр үгрән, тәрбия үгрән”. һөнәр сайлау – кеше тормышында иң әһәмиятле мәсьәләләрнең берсе. Заман үзгәрә барган саен, тормыш яңа һөнәрләр таләп итә. һөнәр сайлаганда кеше үз язмышын сайлый, диләр. Гомерлек юлны сайлау бик авыр. Бүген безнең 9-11 нче сыйныф укучылары алдына да шундый бурыч куела. Ләкин кая барырга? Кем булырга? Шул сорауларга җавап эзләп, без үзебезнең мәктәптә белем алып, хәзерге вакытта төрле уку йортларында белем алган укучыларыбыз белән очрашу үткәрдек. Алар үзләренең уку йортлары, андагы таләпләр, нинди һөнәр ияләре булып чыгулары турында сөйләделәр. Укучыларга файдалы киңәшләр бирделәр. Ә без югары сыйныф укучыларына сайлаган һөнәрләре үзләренә ошасын һәм шатлык кына китерсен, дип теләп калабыз.