2021нче елда гыйнвар аеның 13нче числосында татар әдәбияты классигы, прозаигы, драматургы, публицисты, җәмәгать эшлеклесе һәм татар сатира жанрын булдыручы Фатих Зариф улы Әмирханның тууына 135 ел тулды. Гимназиябездә шушы юбилей датасына кагылышлы күп кенә чаралар уздырыла.
Шуларның берсе бүген, 23нче гыйнварда, 10Б сыйныфында үткәрелде (укытучы Мөхлисуллина Г.Н.). Дәрес-викторинада өлкән сыйныф укучылары Фатих Әмирханның тәрҗемәи хәлен өйрәнеп, төрле формаларда: тест төзү, 2 төркемгә бүленеп, блиц-сораштыру уздыруларда үзләрен бик тә актив күрсәттеләр. Дәрес азагында укучылар интернет киңлекләренә чыгып, Ирекле энциклопедия Википедияне кулланышка алып, әдипкә хронологик таблица төзү эшләрен дәвам иттеләр. Һәрбер укучы үзенә дәрестән файдалы һәм кызыклы материал алды.
Шулай ук Фатих Әмирханның туган көнендә Мөхлисуллина Г.Н. гимназиябез укучылары һәм укытучылары өчен фойеда мәгълүмати стенд оештырды. Бу стенд яныннан һәрбер кеше битараф кына узып китә алмый: туктап, фотосурәтләрне күзәтә, кызыклы мәгълүматны исендә калдыра.