Сугыш беткәнгә дә, 70 ел вакыт узып киткән. Сугыш афәтен күргән  сугыш ветераннары да, тыл ветераннары да, блокадада булучылар да әзәйгәннән әзәя бара. Хөкүмәтебез сугыш чоры кешеләренә соңгы елларда игътибарын арттырды. Аларның пенсиясе дә артты, торак шартлары да яхшырды.

     Менә быел да сугыш беткәнгә, ел уңаеннан төрле чаралар үткәрелә. Безнең 29нчы гимназиядә 10 апрель көнне Автозавод районы ветераннарына “1941-1945нче елларда Бөек җиңүнең 70 еллыгы” медален тапшыру тантанысы булды. Бәйрәм рухы  кунакларны каршы алганда ук башланды. Матур итеп киенгән, кулына чәчәкләр, шарлар тоткан укучылар, “тере коридор” булып, ветераннарны каршы алдылар, актлар залына кадәр озата бардылар.

     Ветераннарны Автозавод районы башлыгы урынбасары Әлмөхәмәтова Елена Виктор кызы котлады, медальләр тапшырды. Бәйрәм тантанасында шәһәр Советы депутаты Александр Моисеевич Коган да катнашты, ветераннарга олы рәхмәтен, җылы сүзләрен җиткерде.

     Гимназия укучылары ветераннарга бәйрәм концерты әзерләгәннәр иде. Сугыш тематикасына җырлар, шигырьләр, биюләр башкарылды. Бәйрәм ике телдә алып барылды.

Бәйрәм ашханәдә дәвам итте. Хөрмәтле ветераннарны тәмле ашлар белән, тулы аш өстәлләре көтә иде.

     Укучыларыбыз ветераннарны өйләренә кадәр озата бардылар.Ветераннар бик канәгать булдылар,үзләренең рәхмәт сүзләрен җиткерделәр.