Көз - муллык ае. Балалар көз аен аеруча көтеп алалар. Мәктәпкә яңа киемнәрен, сумка, кирәк-яракларын бер - берсенә күрсәтү , алай гына да түгел, "Сөмбелә" бәйрәмен бәйрәм итү теләге көчле була аларда. Инде октябрь уртасы җитүгә алар шушы бәйрәмгә зур кызыксыну белән әзерләнә башлый. Матур костюмнар, кулдан эшләнмәләр, төсле рәсемнәрен ярыша-ярыша әзерли балалар.
Мөслим гимназиясе ел да шушы бәйрәмне җиренә җиткереп, матур итеп һәр сыйныфта уздыра. 3А сыйныфын җитәкләүче Ләйсән Габбасовна быел аеруча матур бәйрәм күрсәтте. Бәйрәмдә Көз кызы үзе дә, Кабак әфәнде белән Кыяр дус та, Помидор кызы белән Кәбестә оныгы да бар иде. Җиренә җиткереп әзерләнгән костюмнар, сәнгатьле итеп сөйләгән шигырьләр, дәртле биюләр, моңлы җырлар, татлы ризыклар - болар барысы да матур бәйрәмнең чагылышлары. Шундый матур, эчтәлекле бәйрәм әзерләп, балаларны куандырган укытучыбызга зур рәхмәтебезне җиткерәбез. Укучылары зиһенле, сәламәт булсын, үзенең киләчәктә дә� зур үрләргә ирешүен телибез.