Туган телләр һәм Халыклар бердәмлеге елы уңаеннан 12 февраль көнне Мөслим гимназиясендә районара директорлар, завучлар белән берлектә семинар үтте. Шушы семинарда гимназиянең социаль педагогы Амирова Миләүшә Рустамовна “Тәрбиядән яраладыр тәрбия!” дип исемләнгән тренинг күрсәтте. Семинарга килгән һәр педагог бу тренингта актив катнашып үз фикерләрен җиткерделәр. Бу тренингның төп максаты: бүгенге көндә бала тәрбияләү, шулай ук атаклы галимнәребезнең фикерләре әйтелеп китте. Ата-аналар да, укытучылар да үзләре тәрбияләгән балаларга өмет баглый. Һәрберебезнең алар турында җылы сүз, яхшы фикерләр ишетәсебез килә. Кем генә җимешенең әче булуын, башкаларның аннан йөз чөерүен теләр икән? Һәрберебез балаларыбызның халкыбызга файдалы, үзебезгә мәрхәмәтле, күркәм эшләре белән куандыручы чын Кеше булуларын телибез. Күренекле мәгърифәтчебез Риза Фәхретдиннең “Кеше булыр өчен гыйлем һәм күркәм холык кирәк”, – дигән сүзләре бик урынлы дип уйлыйм. Галим – баланы өстенә һәртөрле бизәк төшерү мөмкин булган бәһале җәүһәр яки һәрнәрсәне язарга яхшы булган ак кәгазь белән чагыштыра. “Әгәр файдасыз бизәк белән мәгънәсез язу язылса, әлбәттә, бизәкче белән язучы гаепле булыр”, – ди ул.