Белем көне – балачак хатирәсе булып һәрберебезнең күңел түрендә саклана торган көн ул. Иң матур кеше – белемгә омтылган кеше. Белемдә – бәхет, белемсезгә – дөнья ләхет, ди бит татар халык мәкале дә. Шуңа күрә һәрчак белемле булыйк, белемгә омтылыйк! Быел беренче мәртәбә парта артына утыручылар тырышып укысын, бетмәс-төкәнмәс белем хәзинәләрен ачсын. Кайгыртучан мөгаллимнәребезгә изге эшләрендә уңышлар һәм сабырлык юлдаш булсын.

Бүгенге Белем бәйрәме иртәсен гимназиябездә 620 укучы каршылады. Бәйрәм тантанасына үзенең матур җырлары белән котлау өчен Республикабызның атказанган артисты Филүс Каһиров та килде. Ә "Яңа гасыр" телерадиокомпаниясенең "Күчтәнәч" тапшыруы алып баручылары Дәү әни белән Дәү әти укучыларны кыңгырау чыңлатып беренче дәрескә озаттылар. Бәйрәм линейкасын "Яңа гасыр" телерадиокомпаниясенең "Манзара" тапшыруы мөхәррире Миләүшә Сибгатуллина алып барды.