Гөлшат апаны искә алу көннәре.

   13 нче гыйнвар, Гөлшат апа Зәйнашеваның туган көнендә, Югары Тәкермән төп гомуми белем бирү мәктәбендә шагыйрәне искә алу кичәсе оештырылды. Кичәне оештыру инициативасы белән Югары Тәкермән авыл җирлеге рәисе Шәрипова Алия Әзһәм кызы чыкты. Бәйрәм Гөлшат апа Зәйнашеваның "Үзем турында" дигән шигырен уку белән башланып китте. Аннан Алия Әзһәм кызы Гөлшат апа турындагы хатирәләрен яңартты. Ул мәктәптә укыган елларда шагыйрә безнең мәктәпнең еш кунагы булган икән. Ул мизгелләр Алия Әзһәм кызының хәтерендә әле бүгенгедәй саклана.

   Мәктәп китапханәчесе Хаматшина Әлфия "Җырлар чишмәсе" дип исемләнгән китап күргәзмәсе оештырды. Укучылар шагыйрәнең төрле елларда балалар өчен язылган шигырьләрен укыдылар, җырларын башкардылар. Кичә шагыйрәнең тормыш һәм иҗат юлына багышланган викторина белән дәвам итте. Укучыларның басып, аның "Кояш гомере телим мин, әнием сиңа! Дигән җырын башкарганда, тәннәр чемердәп куйды. Бәйрәмдә актив катнашкан балаларга авыл җирлеге рәисе Алия Шәрипова кечкенә истәлек -бүләкләр тапшырды." Иманым камил, киләчәктә Югары Тәкермән мәктәбенннән Гөлшат апа Зәйнашева кебек талантлы шәхесләр үсеп чыгачак "дип үз сүзен төгәлләде. Ә инде мондый кичәне үткәрүне традициягә кертергә кирәк дигән тәкъдимне укучылар да, укытучылар да хуплап каршы алдылар.