Новости школы.

6 нчы февраль көнне мәктәп укучылары Түбән Тәкермән клубында оештырылган “Туган якны өйрәнү” музеенда булдылар. Үткәнен белмәгән халыкның киләчәге юк, диләр. Безнең бай тарихыбыз, мәдәниятебез, мәгарифебез, батыр, эшчән халкыбыз бар. Авыллар тарихы – халкыбыз тарихының аерылгысыз бер өлеше. Аларны өйрәнү, үзең яшәгән төбәк белән горурлану хисләре тәрбияләү – һәрберебезнең бурычы.Шуны истә тотып, музейны оештыруга, аңа экспонатлар барлауга искиткеч зур хезмәт салынганлыгы күренеп тора.Монда авылның ,аның эшчән халкының бай тарихы ярылып ята. Әлеге эшләрне башлап йөрүче, оештыручы, бүгенге көндә дә шул эшне дәвам итүче клуб җитәкчесе Гәрәева Гөлназ Габделхәк кызы безгә тәфсилләп авыл тормышы, аның килеп чыгышы, көнкүреше турында сөйләде. Клуб хезмәткәре Хөсәенова Фәридә апа безгә махсус хәрби операциядәге якташларыбызга окоп шәмнәре ясау буенча мастер-класс үткәрде. Укучыларыбыз да әлеге эшләрне өйрәнеп, җиңүгә үзләреннән зур өлеш кертергә телиләр. Гомумән, Түбән Тәкермән халкы иртә- кичен авыл клубында дисәк тә ялгыш булмас. Алар махсус хәрби операциядә катнашучы егетләргә токмач кисү, маскировка сеткалары үрүдә актив катнашалар.Рәхмәт Сезгә ,апалар. Изгелегегез үзегезгә меңе белән кайтсын. Сәламәт булыгыз.