Бүген башлангыч сыйныф укучылары белән, экология айлыгы кысаларында “Туган ягым чишмәләре” дип аталган телдән журнал үткәрелде. Кичә В.Әхмәтшинның Р.Газизов сүзләренә язган “Мамадыш - гүзәл кала”  дигән җыры белән башланып китте. Укучылар Мамадышыбыз һәм авылларыбыз чишмәләре буенча сәяхәт иттеләр. Туган ягыбыз чишмәләре тарихы белән таныштылар.

      Чишмәнең саф суы сусауны гына басып калмый, тәнгә сихәт бирә, көч кертә. Аның янына туктап, бит - кулыңны юсаң, уч тутырып су эчсәң, өстән йөк төшкәндәй була, җиңеләеп каласың. Күрәсең, шуңадыр кешелек дөньясы элек-электән чишмәләргә игътибарлы булган. Аларны чистарту, төзекләндерү һәм тәрбияләп тору изге эш, әҗер-савап санала. Хәзер дә бу изге эшебез дәвам итә. Укучылар белән дә шул хакта әңгәмә алып барылды. Балалар чишмәләр турында шигырьләр укып, җырлар җырлап, табышмакларга җаваплар таптылар.