Укучыларның сөйләм телен, фикерләү сәләтен үстерүдә фольклор әсәрләренең әһәмиятен күрсәтү, милли матурлыкка омтылыш тәрбияләү максатыннан мәктәбебездә татар балалар фольклоры бәйрәме үткәрелде. Фолькло́р – теге яки бу халыкның сүз сәнгате, тел иҗаты. Ул халыкның тормышын, карашын, идеалларын чагылдыра.

      Бәйрәм, фольклорның бер тармагы булган, татар халык такмаклары белән башланып китте. Халык авыз иҗаты әсәрләре: бишек җырлары, такмаклар, санамышлар, табышмаклар, мәкальләр, әкиятләр, мәсәлләр, тизәйткечләр, мәзәкләр өйрәнеп, аларга аңлатма биреп дәвам итте. Йомгаклау өлеше булып, бәйрәмнәрдә, кичәләрдә уйнала торган татар халкының "Йөзек салыш" уены уйналды.

     Фольклор телдән иҗат ителүе һәм телдән-телгә күчеп яшәве белән аерыла. Без үзебенең милләтебезне онытмыйча, милли гореф-гадәтләрне дәвам итәргә, фольклор әсәрләрен сөйләмебездә кулланырга тиешбез. Халык иҗатын өйрәнү – безнең зиһенебезне баета, дөньяга карашыбызны киңәйтә, тел байлыгыбызны, белемебезне үстерә, тарихыбызны аңларга ярдәм итә.