Сабан туе - хезмәт туе,                                                       
Шатлык hәм бәхет туе, шул; 
Уйнап, биеп, жырлап, көлеп 
Бәйрәм итик көн буе.

                   Торган җир – көмеш, туган җир – алтын, диләр. Чынлап та, нинди генә җирләр, нинди генә илләр гизеп, кайларда гына йөрсәң дә, кем генә булсаң да, туган як иң якыны һәм иң кадерлесе. Безнең туган шәһәребез Мамадыш – Республикабызның иң матур җирендә урнашкан һәм аның ерак гасырлардан килгән бай тарихы бар.

    Милләтебезнең үзе кебек борынгы, гаярь, күңелле җыеннары, үзенә генә хас күркәм йолалары бар. Шуларның берсе, җаныбызга дәрт-дәрман, илһам өстәгәне, алгысытканы – Сабантуй. Кешене гомер буе газиз җиренә тартучы, үтә милли һәм моңлы, үтә дә борынгы һәм беркайчан картаймас нинди бәйрәм бар соң? Әлбәттә, Сабантуй! Без дә бу бәйрәмне онытмыйбыз, дистә елдан артык уздырып киләбез. Быел да бәйрәмебез шау-гөр килеп бик матур узды, уку елына йомгак ясалды. Укучыларыбыз төрле бәйгеләрдә, уеннарда катнашып күп бүләкләр алдылар, рәхәтләнеп ял иттеләр. Һәр сыйныф укучылары үзләренең чыгышларын күрсәттеләр, бәйрәмебез җыр-биюләр белән үрелеп барды. Ә  Сабантуенда уйнала торган төп уеннарның берсе, халкыбызның йөзек кашы - көрәш санала.  Безнең бәйрәмебездә дә бу уен бик киеренке барды, көрәшчеләр мәйданда беренчелекне алу өчен бил алыштылар. Сабантуебызның батырлары:

3нче урында – Хадиев Б. 3А сыйныфы, Демьянов А. 6Б сыйныфы.

2нче урында – Хайдаров Р. 4А сыйныфы, Максимов А. 9Б сыйныфы.

1нче урында – Ченин И. 6Б сыйныфы, Марченков А. 9Б сыйныфы.

Фотогалерея