Милләтебезнең үзе кебек борынгы, гаярь, күңелле җыеннары, үзенә генә хас күркәм йолалары бар. Җаныбызга дәрт-дәрман, илһам өстәгәне – Сабантуй. Безнең мәктәбебездә дә, уку елын йомгаклап, һәр ел саен Сабантуй бәйрәме үткәрелә. Бәйрәмгә алдан ук әзерлек эшләре башлана, быел да 26 майда яулык җыю бәйрәме оештырылды. Бу көнне мәктәбебез гөрләп торды, бүләк җыю җырлы-биюле уеннар белән үрелеп барды. Һәр хезмәткәр үзенең бүләген бирергә ашыкты. Бәйрәмнән укучыларыбызның әти-әниләре дә читтә калмады. Петровлар, Мингазовлар, Нагимовлар гаиләләре үз өлешләрен керттеләр. Бүләкләр өчен барыгызга да зур рәхмәт. Сабантуйларыбыз матур, күңелле үтсен, елларыбыз имин, тыныч булсын. Барыгызны да 28 майда үткәреләчәк Сабантуй бәйрәменә көтеп алабыз.