Классташлар кайда хәзер ? Кем булдылар? Кайларда яшиләр? Нинди тормыш җилләре аларны сынады? Кем исән дә, кем юк бүген? Ни кызганыч, әлеге сорауларга тулы җавап юк. Кайберләребезнең бер генә тапкыр да үзе укыган класс белән бергә очрашканы юк. Дөнья куабыз. Онытылмас истәлекләрне уртаклашырга, бер-беребезнең хәлен белергә вакыт тапмыйбыз. Хәтта яшьтәш-классташ-авылдаш хәтәр авыруга юлыкканда, хәл белергә дә килмибез.
Әмма хатаны төзәтергә соң түгел әле. Бүгенге көндә исән-сау яшәгән классташларның-мәктәптәшләрнең-авылдашларның очрашу мөмкинлеге бар. Һәркайсыбызның, ничә еллар узгач, бер-берсен күреп сөйләшәсе дә, ничә еллар артта калган күңелле һәм гамьсез-кайгысыз мәктәп чорларын искә алып утырасы да килә торгандыр.
Мәктәп сезне үзенә чакыра ! Сез үзегезне укыткан укытучылар, классташ-мәктәптәшләрегез белән очрашырсыз, авылдашларыгызны күрерсез, үзегез укыган класс бүлмәләрегезгә кереп йөрерсез.

Очрашу 3 ноябрь 18 сәгатьтә башлана.

Килегез, кайтыгыз, көтеп калабыз !

Мәктәп администрациясе, укытучылар коллективы.
Атабай авылы, 2014 ел, октябрь