27 апрельдә  җирле язучыларыбыз иҗатына  һәм Рәзим Вәлиуллинның 70 еллыгына багышланган “Ач, шигърият, серләреңне” дип исемләнгән муниципаль  шигырь бәйгесе үткәрелде. Бу чарага “Чишмә” әдәби берләшмәсе әгъзалары – Таһир Шәмсуаров, Әнвәр Шәрипов, Рәсим Хәбибулла, “Мәгариф” идарәсенең милли белем бирү буенча баш белгече  – А.И. Вилданова килгәннәр иде. Шулай ук  шигърият кичәсенә Башкорстан төбәге Благовар районыннан килгән укытучылар делегациясе дә килүе нур өстенә нур булды. Аларның төп килү максаты- тәҗрибә уртаклашу.

        Шигърият кичәсе татар теле һәм әдәбияты укытучылары Якупова Р.Р. һәм Батталова М.З. җитәкчелегендә алып барылды. Шигырь бәйрәмендә яңгыраган һәр шигырь – төбәгебез шагыйрьләрнең иҗат җимеше. Нәкъ менә шуны истә тотып, Мәгариф идарәсе һәм “Чишмә” әдәби берләшмәсе әгъзалары сәнгатьле шигырь уку, нәфис сүз осталарын ачыклау максаты белән шигырь бәйгесе игълан ителде. Анда шәһәребездән һәм авылларыбыздан килгән укучылар катнашты. Катнашучылар төбәгебез язучыларының яисә шагыйрьләрнең әсәрен сәнгатьле итеп сөйләргә тиеш иде.

      Шигырь бәйгесе “Шигърият дөньясында”, “Бәхетле балачак”, “Туган як” номинацияләренә бүленде. Анда 30 укучы катнашты. Алар шигырьләрне оста, матур, сәнгатьле итеп укыдылар, ә кайберләре музыкаль композицияләр һәм презентацияләр дә әзерләгәннәр. Жюрида  утыручылар алдында шундый матур сөйләүчеләр арасыннан иң яхшыларын сайлап алу бик авыр булды. Шуңа күрә жиңүчеләрне номинацияләп билгеләргә булдылар. “Шигърият дөньясында” номинациясе буенча  1 нче урынга 11 нче гимназия укучысы , ә 2 нче урынга безнең мәктәбебезнең 8 нче сыйныф укучысы Гимаева Аделина лаек булды..

              Шигърият бәйрәмендә ямь өстәп, безнең мәктәп укучылары жырларын, биюләрен бүләк иттеләр.

        Жинүчеләргә һәм төрле номинацияләрдә катнашканнарга бүләкләрне язучыларыбыз тапшырды. Кичәне тәмамлап, бәйгедә катнашучылар  шагыйрьләр белән бергәләп истәлеккә фотога төшергә онытмады.