Казан шәһәренең УНИКС залында китап укырга һәм бүләк итәргә яратучылар җиденче #әдәбимарафонның тантанасында күреште. Тантананы якташыбыз Ләйсән Рахманова - Шәмсуарова "Тәфтиләү" җыры белән ачып җибәрде. Катнашучыларны Дәүләт Советыннан Римма Атлас кызы Ратникова, шагыйрь - депутат Разил Вәлиев, язучылар, шагыйрьләр: Рабит Батулла, Фоат Галимуллин, Зиннур Хөснияр, Газинур Морат, Рифат Сәлах, Рафис Корбан, Хәбир Ибраһимов, Ленар Шәех, Мәдинә Маликова, Эльмира Шәрифуллина, Илсөяр Иксанова, Гөлсинә апа Галимуллина, Гүзәл Галләмова, Айгөл Әхмәтгалиева, Люция Әблиева, Эльвира Сафина җылы теләкләрен теләп, дипломнар белән бүләкләделәр. Безнең районнан марафонда катнашырга 26 кеше теләк белдергән булса, шуларның 23се генә финалга барып җитте. Безнең мәктәптән беръюлы 7 кеше катнашты: иң яшь катнашучы Аделя Вильданова(5 Б), Галиева Лилия Җәмил кызы, Гыйләҗева Фирая Хәниф кызы, Гыйльметдинова Индира Әнәс кызы, Ризванова Галия Мәҗит кызы, Хәсәнова Энҗе Гыйльмегаян кызы, Хәертдинова Халисә Гасыйм кызы. Шулай ук Сугышлы, Тимәш, Куакбаш һәм Мичурино авылларыннан да марафончылар китап укырга яратуларын дәлилли алды. "Әдәби марафон" (#әдәбимарафон) проекты - ВКонтакте социаль челтәре кысаларында Татарстан китап нәшрияты һәм Татнетны үстерү фонды тарафыннан берлектә оештырылып үткәрелә торган онлайн-проектның чираттагысында 1300 кеше катнашты, нәтиҗәдә тантанага меңнән артык кеше җыелды. Марафонның финал өлешенә китап укырга яратучылар Татарстаннан гына түгел, шулай ук Россиянең төрле төбәкләреннән килгән, хәтта Австралиядә яшәүче милләттәшебез дә кайткан иде.