26 апрель көнне авыл китапханәсендә Г.Тукайны искә алу кичәсе үткәрелде. Анда китаханәче Ләйсән Зиятдинова балаларны Г.Тукайның тормыш һәм иҗат юлы белән таныштырды. Укучылар  шагыйрьнең шигырьләрен сөйләделәр, әкиятләре буенча төзелгән сорауларга җаваплар бирделәр.

17 апрель көнне - балалар бакчасында, балалар бакчасы тәрбиячеләренең район методик берләшмәсе утырышы булды. Зурлар төркеме тәрбиячесе Сәгъдиева Т.Я. мәктәпкә әзерлек төркемендә ачык шөгыль күрсәтте,  тәрбияче Каримова Г.Я. кечкенәләр төркемендә әйләнә-тирә дөнья белән таныштыру шөгыле күрсәтте. Шөгыльләрдән соң Ормышлы балалар бакчасы тәрбиячесе Илалтдинова Г.Я. доклад сөйләде. Соңыннан үткәрелгән чараларга анализ ясалды. 

Зур бер бүләк алган сыман,

Чын күңелдән куандым:

Сыерчык килде, сыерчык,

Сагынып көткән кунагым.

Балалар бакчасы тирәсенә элеп кую өчен, сыерчык оялары ясап биргән әтләребез, Бикбаев Ильдар, Вафин Әкъдәс, Вафин Ильдар һәм Ахмадиев Салих абыйларга бик зур рәхмәт белдерәбез.

7 март көнне кечкенәләр төркемендә "Бәйрәмегез котлы булсын әниләр" дигән бәйрәм тамаша үткәрелде. Балалар әниләренә багышлап шигырь сөйләделәр, җырладылар, биеделәр. Кунак булып килгән Яз кызының һәм Карлосонның биремнәрен үтәделәр. Бәйрәм бик күңелле үтте.

8 март – Халыкара хатын-кызлар көне – иң якты, матур бәйрәмнәрнең берсе. Язның беренче бәйрәме уңаеннан кояш кебек ягымлы, игелекле, аяз көн кебек якты күңелле, чәчәктәй гүзәл затларыбызга күңел түреннән чыккан ихлас котлау сүзләрен һәм иң изге теләкләремне җиткерәм.

Хөрмәтле хатын-кызлар!

Борын-борыннан хатын-кыз җан җылысын, матурлык һәм назлылыкны үзендә гәүдәләндерә, дөньяга яңа тормыш, киләчәккә өмет-ышаныч бүләк итә. Гаилә учагын тергезүче һәм саклаучы да, җәмгыятебезнең терәк-таянычы да ул. Ә илнең көче – яхшы гаиләдә. Бүген тормышыбызда хатын-кызның роле гаять зур. Нинди генә өлкәне алсак та, алар хезмәт салмаган урын юк, дисәк тә хата булмас. Хөрмәтле гүзәл затларыбыз күпкырлы хезмәтләре белән җәмгыятебезнең рухи-әхлакый нигезләрен тотрыклы итүгә, ныгытуга, район, республика, ил казанышларына бик зур өлеш кертә. Гаиләдә бала тәрбияләүдә, шул ук вакытта җитештерү тармагында фидакарь хезмәт үрнәкләре күрсәтеп, хатын-кызларыбыз соклану тудыра, тирән ихтирам уята.

Хөрмәтле гүзәл затлар, коллегалар! Сезне матур бәйрәмегез белән чын күңелдән тәбриклим. Ныклы сәламәтлек, бәхет, якыннарыгызның хөрмәтен һәм сөюен, иминлек, бөтен изге эшләрегездә яңадан-яңа уңышлар телим!

Зурлар төркемендә 8 март бәйрәменә багышлап ачык шөгыль күрсәтелде. Тәрбияче апалары Сагъдиева Т. һәм Габдрахманова Г. белән берлектә балалар яз һәм әниләр турында шигырьләр сөйләделәр, җырлар җырладылар, табышмакларга җаваплар эзләделәр, мәкальләр әйтештеләр. Театральләштерелгән тамаша күрсәттеләр.

22 февраль көнне балалар бакчасында Ватанны саклаучылар көненә багышланган кичә үткәрелде. Балалар әтилргә багышлап шигырьләр сөйләделәр, җырлар җырладылар, биеделәр. Балалар  үзләренең куллары белән ясалган бүләкләр тараттылар. Әтиләр төрле конкурсларда катнаштылар.

Кечкенәләр төркемендә "Спорт һәм сәламәтлек" айлыгы башланды. Балалар табигатькә экскурсиягә чыктылар, чанада шудылар.