Сведения об истории становления и развития ГАПОУ "Лениногорский политехнический колледж" / "Лениногорск политехника көллияте" Дәүләт автоном һөнәри белем бирү учреждениесе барлыкка килү һәм үсеш тарихы турында мәгълүмат

Сведения об истории становления и развития ГАПОУ "Лениногорский политехнический колледж"

"Лениногорск политехника көллияте" Дәүләт автоном һөнәри белем бирү учреждениесе барлыкка килү һәм үсеш тарихы турында мәгълүмат

Лениногорск политехника көллиятенең үсеш тарихы – үткәне, бүгенгесе һәм киләчәге – турыдан-туры һөнәри белем бирү өлкәсендә хезмәт иткән белгечләр белән бәйле.

Лениногорск һөнәри белем бирү учреждениеләрендә үз эшенә чиксез тугрылыклы, әлеге эшчәнлекнең зурлыгын һәм әһәмиятен аңлаган җитәкчеләр хезмәт итә.

Иң элек бөтен республика буенча төзелеш училищелары урта мәктәпләр биналарында – Лениногорск шәһәрендә исә 8 нче санлы мәктәптә – урнаша.

Алга таба әлеге уку йортлары зур үзгәрешләргә дучар була. 1953 елда завод-фабрикалы укыту мәктәбе үз ишекләрен Олег Кошевой урамында урнашкан биш бинада ача. Аның беренче директоры булып Александр Кириллович билгеләнә. 1956 нчы елда җитәкчелек алмашына. Директор урыны шактый гайрәтле, зирәк, тәҗрибәле кешегә – Александр Андреевич Макаровка – тапшырыла. Искиткеч акылы, оештыру сәләте, зыялылыгы һәм хезмәттәшләре ярдәме белән ул бик күп эшләр башкара. Аның зур казанышы булып остаханәләр, училищеның спорт залын төзү тора. Коллектив алдында квалификацияле эшчеләр әзерләүнең сыйфатын арттыру, чыгарылыш планын һәм 1957 нче елга җитештерү заказлары планын үтәү кебек зур бурычлар тора.

Алтмышынчы, җитмешенче еллар һөнәри белем билү системасына яңа этәргеч бирә. 8 нче санлы завод-фабрикалы укыту мәктәбе исеме 32 нче санлы шәһәр һөнәри-техник училищесына үзгәртелә. 1967-1971 нче елда әлеге уку йортында Б.С.Хисмәтуллин, 1971-1972 нче елларда исә А.А.Минязев җитәкчелек итә.

1972 нче елдан алып 1985 нче елга кадәр училищены таләпчән, гайрәтле, максатчан кеше – Картежников Анатолий Петрович – җитәкли. Бу елларда 32 нче санлы техник училищесы махсус белем бирү белән беррәттән гомуми урта белем бирү һөнәри-техник училищесына үзгәртелә.

1985-1988 нче елларда әлеге эшчәнлекне В.А.Бердинских дәвам итә. 1988 нче елдан алып 2016 нчы елга кадәр исә әлеге белем бирү учреждениясендә Р.А.Шәмсетдинов җитәкчелек итә. Рәсим Әдегам улы белем бирү йортының тормышына күп үзгәрешләр кертә. Аның җитәкчелегендә уку йорты башта лицей, аннан соң көллият статусына ия була һәм шәһәрдә генә түгел, республикада да иң алдынгы уку йортларының берсенә әверелә.  

2016-2018 нче елларда исә көллияттә Рафаэль Фәрит улы Кашапов җитәкчелек итә.

2018 нче елдан алып Лениногорск политехника көллияте Рөстәм Рафаэль улы Минязев җитәкчелегендә үсеш ала. Бу ике ел белем бирү оешмасының төп бурычын үтәү – яшьләр өчен һөнәри белем алу мөмкинлеген һәм сыйфатын яхшырту – юнәлешендә аеруча нәтиҗәле була. Федераль грант кысаларында лабораторияләрнең һәм җитештерү остаханәләренең матди-техник базасын яңарту һөнәри күнекмәләр алу һәм камилләштерү өчен заманча шартлар тудырырга мөмкинлек бирә.

Бүгенге көндә көллият директорының төпле җитәкчелеге укучылар һәм педагоглар эшчәнлегендә зур нәтиҗәләргә ирешүгә юл ача.

Рөстәм Рафаэль улы хезмәттәшләренең эшчәнлеген нәтиҗәлелеккә юнәлтә. Көллият студентлары район һәм республикада гына түгел, халыкара олимпиадаларда да җиңү яулый. Укытучылар һөнәрләр буенча авторлык программалары төзи, иҗади бәйгеләрдә һәм проектларда катнаша.

Рөстәм Рафаэль улы алдагы елларда ирешелгән казанышларны югары бәяли, көллиятне торгызуга һәм үстерүгә зур өлеш керткәннәре өчен ветераннарга рәхмәтен белдерә.

Лениногорск политехника көллиятенең коллективы үз алдында яңадан-яңа әһәмиятле бурычлар куя. Укучыларның сыйфатлы белем алуы, кирәкле һөнәр үзләштерүе, тормышта үз урыннарын табуы, илнең лаеклы гражданнары итеп тәрбияләнүе, кешеләр файдасына хезмәт итүе – көллият өчен иң мөһиме.