Без пионер чакларда…
Бүгенгедәй әле хәтеремдә
Пионерга кергән көннәрем.
Кызыл байрак янына басып
Тантаналы вәгъдә биргәнем.
Ә аннан соң апа, абыйлар
Бәйләделәр кызыл галстук.
Ә күкрәгемдә янып тора минем
Ленин бабай рәсемле значок.
Шатланамын, башым күккә тиде,
Мин бүгеннән Ильич оныгы.
Сынатмамын һич тә, мин булырмын
Һәрвакытта, - дидем алдынгы.
Пионерда кайнап, белми калдым
Комсомолга килеп кергәнем.
Биргән вәгъдәмә тугры калып,
Олы юлга чыгып киткәнмен.
Ә пионер миңа бик тә якын
Гел дә янәшәмнән атлады.
Чөнки минем хезмәт юлым да бит
Пионерлар белән башланды.
Күпме сулар аккан, еллар узган, 
Ә ул еллар миңа бик якын.
Әгәр мөмкин булса кире кайтып,
Бәйләр идем кабат пионер галстугын.
Флера Шәйхуллина.

          Пионериягә 100 ел тулу уңаеннан мәктәптә төрледән-төрле чаралар үткәрү дәвам итә. Бүген “Без пионер чакларда” дигән исем астында төрле чорларда пионервожатый булып эшләгән укытучылар һәм элеккеге пионерлар белән очрашу булып узды. Алар үзләренең ничек итеп октябрят, пионер, комсомол булулары һәм пионервожатый булып эшләгән чорлары турында ялкынланып сөйләделәр. Чара барышында укучыларның дружина байрагын алып керү мизгеле аеруча истә калырлык булды. Бәйрәмдә күп кенә элеккеге пионер җырлары җырланды. Бу очрашу килгән кунакларда да, балаларда да якты истәлек һәм хәтирәләр калдырды.