БЕР ШИГЫРЬ СИН, УКЫТУЧЫМ.

Йөрәккә чигеп язылган
Бер шигырь син, укытучым.
Ачып һәр көн укый торган
Бер шигырь син, укытучым.

Болыт кебек агып килгән,
Кояш кебек калкып килгән,
Сөю офыгыннан менгән
Бер шигырь син, укытучым.

Илемнең һәр почмагында
Тавышың – күңел түрендә.
Юллап-юллап ятланылган
Бер шигырь син, укытучым.

Йөрәгемдә саклап йөрткән,
Һәр сулышта истә тоткан,
Чәчәк кебек хуш ис сипкән
Бер шигырь син, укытучым.

Дөньябызны нурландырган –
Күзең – кояш, күңелең – таң.
Сөю серләрен өйрәткән
Бер шигырь син, укытучым.
(Бәстами Язган, төрек балалар язучысы; Сания Әхмәтҗанова тәрҗемәсе)

          Хөрмәтле Федотовка мәктәбе укытучылары! 
          Һөнәри бәйрәмегез - Укытучылар көне уңаеннан сезгә ихлас һәм җылы тәбрикләү сүзләрен җиткерәбез.
          Һәрбер кешенең тормыш сукмагы мәктәптән башлана һәм һәр кешенең үз укытучысы була - ул тормышта үз юлыңны табарга ярдәм итә. Укытучы һөнәре - иң хөрмәтле һәм мактаулы хезмәтләрнең берсе. Бәлки шуңадыр да берәү дә үзенең укытучысын онытмый, әхлаклылык, әдәплелек, зыялылык үрнәге, остазы буларак аның образын күңелендә йөртә.
          Сезнең игътибарлы, таләпчән булуыгыз һәм күңел җылыгыз балаларга сәләтләрен ачарга, тормышта үз юлларын табарга ярдәм итә. Йөрәгегездә бервакытта да яхшылык һәм зирәклек бетмәсен. Әлеге бәйрәм сезгә бары тик шатлык хисе китерсен. Нык сәламәтлек, гаилә бәхете, иминлек һәм эшегездә яңадан-яңа уңышлар телибез.

Мәктәп администрациясе.