21 нче апрель көнне башкалабыз Казанда 2013 – 2014 нче уку елында Татарстан Республикасы мәгариф һәм фән министрлыгы, Татарстан Республикасы Язучылар берлеге, Казан (Идел буе) федераль университеты белән берлектә татар телендә иҗат итүче мәктәп укучылары арасында үткәрелгән “Илһам” республика яшь язучылар бәйгесенең йомгаклау көне уздырылды. Без дә  – Кукмара 4 нче урта гомуми белем бирү мәктәбенең 5А сыйныфы укучысы Ромазанов Данил, 5Б сыйныфы укучысы Абдуллина Диана – татар теле һәм әдәбияты укытучысы Галимуллина Зөлфия Марсил кызы җитәкчелегендә кунакка чакырылдык. Программа буенча КФУның актлар залында язучылар белән очрашулар, мастер-класслар үткәрелде, Кремль буйлап сәяхәт оештырылды. “Биләр Палас” ресторанында төшке аштан соң, Г.Камал исемендәге Татар дәүләт Академия театрына “Илһам” конкурсының йомгаклау тантанасына җыелдык. Татарстан Республикасы Премьер-министры урынбасары Татарстан Республикасы мәгариф һәм фән министры Э.Н.Фәттахов, Татарстан Республикасы Язучылар берлеге рәисе Р.Х.Корбанов, бер төркем татар язучылары барыбызны да бәйрәм белән котладылар, киләчәктә иҗади уңышлар теләделәр, җиңүчеләрне дипломнар һәм премияләр белән бүләкләделәр. Тамаша җыр-моң, биюләр, Г.Камал исемендәге Татар дәүләт Академия театры артистлары тарафыннан әзерләнгән спектакльләрдән өзекләр белән тагы да күңелле узды.

Бу көн бик истәлекле булды. Күңелләребез тагы да илһамланып, канатланып кайттык.