Карга боткасы бәйрәме

       Татар халык календаренда  иң күңелле язгы бәйрәмнәрнең берсе  Карга боткасы бәйрәме. Бу бәйрәм бик борынгыдан килә. Элекке заманда кешеләр ни өчен яз булганын белмәгәннәр. Алар яшел язны җылы яклардан кара каргалар алып килә дип уйлаганнар. Шуның өчен, карлар эреп, сулар ага башлагач, каргалар килү хөрмәтенә бәйрәм ясый торган булганнар. Аны “Карга боткасы”, яисә “Карга туе” дип атаганнар. Кешеләр өйдән - өйгә кереп май, ярма, сөт, шикәр, тоз җыеп йөргәннәр. Такмаклар әйткәннәр:

                                         Өйдәме, түтәй,

                                         Җәтрәк бир күкәй.

                                         Бирсәң безгә өч күкәй,

                                         Тавыгың салыр йөз күкәй.

                                         Май кирәк, ярма кирәк,

                                         Карга туена бар да кирәк.

Аннары тау битләрендә, елга буйларында казан асып ботка пешергәннәр. Уйнаганнар, биегәннәр, күңел ачканнар. Бәйрәм бергәләп ботка ашау белән тәмамланган. Ботканы үзләре генә ашап бетермәгәннәр, өйләренә кайтып киткәндә: “Рәхмәт кошкайлар, безгә язны алып килдегез!”- дип каргаларга калдырып китә торган булганнар.

      Безнең “Ромашка” балалар бакчасында да бу бәйрәм бик күп еллардан бирле уздырылып килә. Балалар белән алдан шигырьләр, җырлар өйрәнәбез, татар халык уеннарын кабатлыйбыз, искә төшерәбез. Быел да, матур кояшлы яз көнендә, Карга боткасы бәйрәмен уздырдык. Тәрбиячеләр, балалар белән урамда җырлар җырладык, шигырьләр сөйләдек, татар халык уеннарын уйнадык. Соңыннан бергәләп, тәмле итеп ботка ашадык. Барлык кеше күтәренке күңел белән бәйрәмнән таралышты.

Татар теленә өйрәтүче тәрбияче Сәйфетдинова Д. Г.