15 ноябрь көнендә безнең балалар бакчасында кунакта Ак калфак Бөтендөнья татар хатын – кызлары иҗтимагый оешмасы катнашында бик матур  чара булып узды. Без  кунакларны бакчада алып барыла торган милли тәрбия белән таныштырдык.  Бүгенге көндә татар халкының мәдәнияте аша   балаларда милли үзаң тәрбияләү  бик  актуаль,  чөнки үз тарихын белмәгән халыкның киләчәге юк. Моның өчен һәр бала үз гаиләсенең, туган җиренең тарихын белергә, шуның аша халыкка якынаерга тиеш. Традицияләрне, гореф-гадәтләрне, йолаларны балаларга кечкенәдән өйрәтү милли аң формалаштыруга ярдәм итә. Бу юнәлеш буенча бездә бик күп эшләр башкарыла. Бүгенге чарада да татар  халкының гореф – гадәтләре, үткәне   белән таныштык. Балалар һәм килгән кунаклар белән киездән эшләнгән беләзекләрне татар милли үрнәкләре белән бизәү буенча мастер – класс күрсәттек. Ул беләзекләрне балалар кунакларга бүләк иттеләр.

      Кукмара шәһәренең төрле  объектлары белән таныштыруга багышланган брифинг – уен да кунакларга бик ошады. Бу уен аша без төбәгебездә яшәүче халыкларның мәдәнияте белән таныштырабыз, туган якка мәхәббәт тәрбиялибез. Чара балалар башкаруында Абдулла Алишның    “Куян кызы” әкиятен сәхнәләштерү белән тәмамланды. Килгән кунаклар да, балалар һәм бакча коллективы да бүгенге очрашудан  канәгать калды.

Татар теленә өйрәтүче тәрбияче

 Сәйфетдинова Дамира Гаязетдиновна