20 март көнне Чистай районының 5 нче номерлы мәктәп базасында Татарстан муниципаль районнары мәгариф идарәләренең милли мәгариф һәм төбәкара хезмәттәшлек буенча методистлары өчен “Чистай муниципаль районы милли мәгарифе: бүгенге торышы һәм үсеш перспективалары” дигән темага республика семинар – киңәшмәсе булып узды. Семинар эшендә Башкарма комитетының социаль мәсьәләләр буенча урынбасары Р.Г.  Хаматов, мәгариф идарәсе җитәкчесе Г.Ә. Нәбиуллин, мәгариф һәм фән министрлыгының милли мәгариф һәм төбәкара хезмәттәшлек идарәсе  җитәкчесе Л.М. Әхмәтҗанова катнашты. Семинар “Туган якта “Туган тел”не көйлим, бәхетлемен шуңа мин” дип исемләнгән әдәби – музыкаль күренеш белән ачылып китте. Соңыннан  районның барлык татар теле һәм әдәбияты укытучыларның  алдынгы эш тәҗрибәсен яктырткан  күргәзмәләр  тәкъдим ителде. Районның бер төркем укытучылары мастер-класслар күрсәттеләр, чыгышлары белән тәҗрибә уртаклаштылар. Методистлар өчен апрель аена эш планы каралды.