Бөтен халык бәйрәме – Җиңү көне барыбыз өчен дә изге көн. Бүгенге фронтовиклар, тыл хезмәтчәннәре, өлкән буын кешеләре өчен ул – хәвефле яшьлекләре, авыр сынаулар кайтавазы да. Ә бүгенге буын өчен 9 май – халык батырлыгының иксез-чиксез булуының, Ватанга олы мәхәббәтнең   гәүдәләнеше ул. Шушы изге бәйрәмне лаеклы каршылау өчен районыбызның һәр авылында төрле чаралар үткәрелә. Әлбәттә, мәктәпләр дә мондый изге эшләрдән читтә калмый.

8 май көнне яу кырында башларын салган авылдашларыбыз  хөрмәтенә авылыбыз уртасына салынган һәйкәл каршысына  Бөек Җиңүгә багышланган тантанага җыелдык. . Укучылар яуда үлеп калган авылдашларыбызны искә алып, аларның исемнәре язылган һәйкәлгә чәчәк букетлары, веноклар куйдылар. Кызганыч, тыл һәм сугыш ветераннарының сафлары сирәгәеп бара. Авылыбызда бер генә сугыш ветераны калды – Данилов Василий Герасимович. Тантанада  сугыш эпизодларын искә алып, үзенең сугышчан юлы турында сөйләгәндә укучылар аны тын да алмый тыңладылар.