10 нчы декабрь көнне туган тел һәм әдәбият укытучысы Сәхәбиева Гөлфия Хафиз кызы  “Туган тел ел укытучысы -2020” конкурсы  кысаларында  “Әбиемнең серле сандыгы” исемле мастер- класс күрсәтте. Бу осталык дәресендә  Гөлфия Хафизовна үз дәресләрендә  һәрдаим куллана торган методик алымнарын  коллегаларына тәкъдим итте.  “Шок”,  “Табышмаклы бирем”, “Син күрсәтсәң- мин эшлим”, “Фишбоун (Балык скелеты)” алымнары  коллегалар өчен яңалык булмаса да, методик яктан камил, нәтиҗәле, гамәли әһәмияткә ия булган, туган тел, әдәбият дәресләрендә теманы киңәйтеп өйрәнгәндә  аны практик яктан тирәнрәк ачуга ярдәмче алымнар булып кала.  Укытучы эш тәҗрибәсе белән уртаклашу барышында  дәресне фәнни яктан гына түгел, тормыш белән бәйләп аңлату  формаларын, белем дәрәҗәсен күтәрү алымнарын күрсәтте. “Татар орнаментлары”н өйрәнүгә багышланган мастер- классның үзенчәлеге шунда иде, укытучы үзе дә, фокус- группадагы коллегалар да милли киемнән иделәр. Заман таләпләренә туры килгән  дәрес оештыруда укытучының роле зур - Гөлфия Хафизовна да  эшне җиренә җиткереп эшли белә, дәресләрендә ул артист, шагыйрь,биюче, кул остасы... Нинди генә роль башкармасын, Гөлфия Хафизовна методик яктан өлгергән, фәнен яратып, белеп эшләүче мөгаллим булып кала. Сезгә һәрчак уңышлар юлдаш булсын.