15 нче ноябрь көнне Алабуга шәһәренең үзәк китапханәсендә шәһәребездә иҗат итүче, төбәгебез тарихын өйрәнүче, Татарстан республикасы язучылар Берлеге әгъзасы, Саҗидә Сөләйманова исемендәге дәүләт премиясы лауреаты Гөлзада Хаҗи кызы Әхтәмованың юбилей кичәсе узды. Зур бәйрәмгә Чаллы шәһәре кунаклары, “Чулман” әдәби берләшмәсе әгъзалары, Алабуга шәһәре мәгариф хезмәткәрләре, татар теле һәм әдәбияты укытучылары һәм укучылар җыелды. Кичәдә Гөлзада Әхтәмованың олугъ бәйрәме хөрмәтенә котлау сүзләре яңгырады, укучылар тарафыннан шигырьләр башкарылды. Мәктәбебез укучылары Шәрәфиев Булат һәм Нуриева Динара шагыйрә иҗат иткән шигырьләрне башкарды, милли мәсьәләләр буенча директор урынбасары Хадиуллина Әнисә Рәшит кызының Гөлзада Әхтәмовага багышлап язылган шигыре һәркемнең күңеленә хуш килде. Бүгенге көндә төбәк шагыйрәбез һаман да тынгысыз тормыш белән яна. Шәһәребезнең әдәби-мәдәни хәрәкәтенең үзәгендә кайный. Хөрмәтле мөгаллимебезне чын күңелдән булачак юбилее белән тәбриклибез. Киләчәк тормышында исәнлек-саулык, зур уңышлар телибез; яңадан-яңа иҗат җимешләре көтеп калабыз. Алга таба да шатлыкта, куанычта, бәхеттә яшәргә язсын сезгә!