Мәктәптә Халыкара туган тел көненә әзерлек эшләре алдан ук башланып китте. Китапханәчеләр  туган телгә багышлап, шигырь иҗат иткән язучыларның китапларыннан күргәзмә оештырдылар. Ә озын тәнәфесләрдә һәр сыйныф туган тел турында җыр башкарды. 8-9 нчы сыйныф җитәкчеләре Лев Николаевич һәм Иван Владимировичның чуваш һәм рус телләрендә җыр башкарулары  тел бәйрәмен тагын да ямьләндерде.

15 нче февраль көнне мәктәптә “Әфганстан – мәңгелек җан ярасы” дип исемләнгән очрашу кичәсе булып узды. Кичәдә ветеран солдатларның мәктәп хатирәләрен барлап, яттан өйрәнгән шигырьләрен сәнгатьле итеп сөйләп бирүләре барыбызны да әсир итте.

Татар теле кабинетында “Утлы еллардан юллар...” дип исемләнгән укучылар конференциясе дә бик кызыклы узды. Аны 5-7 нче сыйныф укучылары белән берлектә Вилданова Дилүзә һәм Миначева Райнә үткәрде.Татар теле укытучысы Насибуллина Гөлинә йомгаклау сүзе белән чыкты.

Атна башында Фатих Кәрим һәм Муса Җәлил шигырьләрен сәнгатьле сөйләү буенча конкурс игълан ителгән иде. Сайлап алуның өченче туры 28 нче февральдә үтәчәк.

21 нче февраль көнне “Туган телем- иркә гөлем” дип исемләнгән бәйрәм кичәсе тантаналы линейка белән башланып китте. Кичәдә бердән алып тугызынчы сыйныфка кадәр барлык укучылар, укытучылар һәм әти- әниләр катнашты. Шигырь, җыр һәм биюләр белән бәйләнеп барган бәйрәм бик матур үтте. Шулай ук планда каралганча, “Туган телем гасыр диңгезләрен, кичә- кичә килә ерактан”  дип исемләнгән сыйныф сәгате һәм 5-7нче сыйныфлар арасында үткәрелгән Тел бәйгесе укучылар күңелендә үз телебезгә карата кызыксыну һәм горурлану хисләре уяткандыр дип өметләнеп калабыз.