Татар теленә кызыксынуны арттыру, әдәби телдә дөрес сөйләм һәм язу күнекмәләрен үстерү, орфографик һәм грамматик хаталар ясамыйча язуны булдыру, татар теле белгечләрен һәм укытучыларын тагын да популярлаштыру максатындагы «Татарча диктант» акциясе 2016 елдан бирле үткәрелә. Быел ул Казан губернасында беренче рус-татар башлангыч мәктәбенә һәм икетеллелеккә нигез салучы буларак тарихка кереп калган күренекле татар мәгърифәтчесе, тел белгече һәм язучы Каюм Насыйриның тууына 200 ел тулуга багышланды. Акцияне «Бөтендөнья татар конгрессы» Халыкара берлеге башкарма комитеты, Татарстан Республикасы Яшьләр эшләре министрлыгы, Казан (Идел буе) Федераль университеты, Филология һәм халыкара багланышлар институты оештыра. 

Безнең Алимов Зариф исемендәге Яңа Кәкерле төп гомуми белем бирү мәктәбе дә «Татарча диктант» бөтендөнья акциясендә актив катнашты. Алар Каюм Насыйриның «Кабуснамә» хикәятләреннән өзек яздылар. 180 сүзне үз эченә алган диктант тексты туган телебезнең гаҗәеп матур аһәңле яңгырашына, тел-сурәтләү чараларының байлыгына, авторның чын мәгънәсендә сүз остасы булуына безне тагын бер тапкыр инандырды.