26 апрельдә Татарстан Республикасы Туган тел көнен һәм татар халкының бөек шагыйре Габдулла Тукайның тууына 139 ел тулуны билгеләп үтә.
Башка бәйрәмнәр һәм истәлекле даталар белән беррәттән, бу көн һәркайсыбызның күңелендә аерым урын биләп тора. “Туган телеңне онытсаң, рухыңны югалтырсың…”– дип язган шагыйрь. Туган телен белмәгән кеше үз халкыннан да, милли тамырларыннан да аерыла, туган җиренә дә ят була.
Бүген бөек шагыйрь Габдулла Тукайның туган көне, Туган тел көне! 
Шул уңайдан, балаларда  Габдулла Тукайның әсәрләренә, татар теленә, мәдәниятенә, сәнгатенә, гореф-гадәтләренә мәхәббәт тәрбияләү максатыннан,   мәктәбебездә “Бәйрәм бүген!” исемле чара үтте. Чара барышында шагыйрьнең балачак елларыннан алып, гомеренең соңгы көннәренә кадәрге тормыш юлы, иҗади һәм иҗтимагый эшчәнлеге кабат күз алдыннан кичерелде. Укучылар Тукайның шигырьләрен яттан сөйләделәр, шагыйрь сүзләренә иҗат ителгән җырларны тыңладылар, викторина сорауларына җаваплар бирделәр. 
Бәйрәм бик эчтәлекле һәм кызыклы үтте, күмәкләшеп, «Туган тел» җырын башкару белән тәмамланды..
Кыска гына гомер кичерсә дә, Тукай гаять зур мирас калдырган, аның шигырьләре туган телгә, туган якка, аның табигатенә мәхәббәт белән сугарылган. Тукай – безнең рухыбыз, теләгебез, тарихыбыз! Аның иҗаты безгә туганлыкны, милләтнең мәңгелек кыйммәтләрен өйрәтә. Бүген дә аның сүзләре күңелләрдә яши, киләчәк буыннарга юл күрсәтә.