21 февраль Халыкара туган тел көне буларак билгеләп үтелә. «Туган телен кадерләгән халык үзе дә кадерле булыр», — ди халык мәкале. Чөнки туган тел — ул үзе бер дөнья. Бәлки, гүзәллек, сөйкемлелек һәм тылсым тулы дөньядыр да. Тел — халыкның хәтере, җаны, халыкның иң зур байлыгы һәм ул һәр халык горурланырга тиешле иң зур кыйммәт. Һәр халыкның иң зур байлыгы, иң кадерле рухи хәзинәсе һичшиксез аның теле. Үз телеңне яхшы белү, аны саклау, үстерергә омтылу ул безнең бурычыбыз һәм шушы юнәлештә күп төрле  эшләр башкарабыз.
  Халыкара туган тел көне уңаеннан мәктәбебездә «Туган тел ул була бер генә - туган телнең кадерен бел генә» дип исемләнгән бәйрәм  оештырылды. Бәйрәмдә тел турында шигырьләр,  мәкальләр, җырлар  яңгырады.  Авылыбызның хөрмәтле кешеләре- әфган сугышы ветераннары Садыков Илдар Инар улы белән Хайруллин Илдар Иниятулла улының бәйрәмебездә катнашуы безгә зур бүләк булды. Ә мәктәп директоры Шамил Мөбәрәкҗан улы Абдрахманов белән Садыков Илдар Инар улының баянда һәм гармунда уйнаулары исә бәйрәмне тагын да ямьләндереп, нурландырып җибәрде. 
  Бәйрәм кичәсе Г.Тукайның һәр татар кешесе өчен  туган тел гимны  булган ”Туган тел” җыры белән тәмамланды.