Советлар Союзы Герое Алимов Зариф исемендәге Яңа Кәкерле төп гомуми белем бирү мәктәбе авылда балаларга белем бирүче, патриотик рухта тәрбияләп, аларны хезмэтне яратырга өйрәтеп, әхлакый яктан рухи җанлы кешеләр итеп тәрбияләуче, тормышка әзерләуче булса, Яңа Кәкерле авылы мәчете - балаларны ислам дине кануннарына өйрәтүче . “Авылның күрке – мәчет, мәчетнең күрке – халык”, – диләр. Шунысы куанычлы: авылга ямь биреп торучы мәчетебезнең ишеге һәркемгә көннең теләсә кайсы вакытында ачык. Ә мәчеткә йөрүче олы йөрәкле, мәрхәмәтле бабайларыбыз һәм абыйларыбыз тормышыбызга ямь өстиләр һәм үзләренең изге гамәлләр кылуларын дәвам итәләр. Уку елы башында авылыбыз мәчете үзенең премиясен булдырган иде. Һәм ул һәр чирек саен иң тәрбияле укучыларны бүләкләп килә. Бүген изге Рамазан аеның соңгы көнендә мәчетебезнең имам- хатыйбы Рамил хәзрәт Алимов мәчет картлары (Хайруллин Марс, Зиннатуллин Марс) белән берлектә укучыларыбыз Науметов Илназга һәм Замалтдинов Риязга премияләр тапшырдылар. Соңыннан һәрбер укучыга Ураза гаете алдыннан фитыр сәдакасы тараттылар. Аллаһы тәгаләнең ризалыгы өчен булсын!Рәхмәт яусын! Киләчәктә дә сау-сәламәт булып, гел матур гамәлләр кылып яшәргә язсын сезгә, мөхтәрәм авылдашлар!