Нәүрүз – татар халкының иң матур йола бәйрәмнәреннән берсе, ул 21 мартта көн белән төн тигезләшкән көнгә туры килә. Бу бәйрәм безнең төбәкләрдә, язны каршылап, язгы чәчү эшләре алдыннан үткәрелә торган халык бәйрәме булып санала. Ул – дуслык, киң күңеллелек, кунакчыллыкны үз эченә ала. Нәүрүз – фарсыча “яңа көн” дигәнне аңлата, икенче төрле язгы Яңа ел, дип тә әйтәләр. Бу көнне кешеләр кунак чакыралар, бер-берсенә булган үпкә-ачуларын оныталар, җырлыйлар һәм бииләр, рәхәтләнеп күңел ачалар, уеннар уйныйлар. Бәйрәм хуҗасы – Нәүрүзбикә.
   Көн белән төн тигезләшкәндә үткәрелә торган әлеге бәйрәмне безнең мәктәп укучылары да бик күңелле итеп билгеләп уздылар. Бәйрәм барышында татар халкының милли уеннарыннан “Кәрия- Зәкәрия”,”Йөзек салыш” уеннарын уйнадылар, табышмакларга җавапларны да бик тиз таптылар, матур итеп шигырьләр дә сөйләделәр.   Бу бәйрәмнең рухи байлыгы турында киләчәктә дә онытмыйк. Аның кешелекле традицияләрен саклыйк һәм баетыйк! Нәүрүз тынычлык, дуслык, тигезлек бәйрәме булып калсын һәм гасырларга барсын!
   Бәйрәмнең ахырында укучылар да, укытучылар да кайнар коймак, пылау белән сыйландылар.