Ничә көн буе безнең авылда гына түгел, бөтен әйләнә - тирәдә өзлексез кар яуды, туктаусыз буран ыжгырды. Юлларны, ишегалларын кар күмеп китте. Өлкән яшьтәгеләр өчен карның күп явуы уңайсызлыклар да тудырды. Аларның күбесенең сәламәтлеге какшаган, балалары читтә яшәү сәбәпле, көрт арасыннан сукмак ерып кына йөрергә мәҗбүр. Мәктәп олыларны онытмый, алар турында һәрвакыт кайгырып, булышып тора. Бүген, көн аязытып җибәргәч, мәктәпнең 9 нчы сыйныф укучылары, укытучылар Абдрахманов Рамил һәм Шумилов Иван Владимирович белән берлектә, ялгыз яшәгән әби-бабайларның ишегалларыннан карларын көрәп, юллар ясадылар. Авылдашыбыз Советлар Союзы Герое Алимов Зариф Закир улы туып - үскән йорт алдын да кардан чистартып кайттылар .