Алимов Зариф исмендәге төп гомуми белем бирү мәктәбе укучылары махсус хәрби операөиядә катнашучы, туган авылына кыска вакытлы ялга кайткан Илнур Ахметзянов белән очрашты. Әлеге чараның төп максаты – укучыларда үрнәк итеп куярлык патриотлык хисе тәрбияләү һәм позитивлык формалаштыру иде.

 Ял көннәре санаулы гына булса да, Илнур үзе укыган мәктәпкә килеп, белем биргән укытучылары һәм укучылар белән күрешергә вакыт тапты.

  Очрашу барышында кыю авылдашабыз укучыларга үзенең теләкләрен җиткерде, туган илебезгә тугры чын гражданнар булып үсәргә, яхшы билгеләргә генә укырга кирәклек турында әйтте.

 Яңа Ишле авыл җирлеге башлыгы Радик Мухаметзянов үзенең чыгышында повестка килүгә, берсүзсез илебезне сакларга чыгып киткен, хәрби бурычын намус белән үтәүче Илнурга рәхмәтен белдерде. Сугыштан исән-имин кайтуын теләп, тиздән шатлыклы очрашуларда күрешербез, диде ул сүзен йомгаклап. Мәктәп директоры Шамил Абдрахманов үсеп килүче буынның көндә Ватаныбызны сакларга киткән геройлар үрнәгендә тәрбияләнүе турында сөйләде, аларның гаиләләренә олы рәхмәтен белдерде. Укучыларга солдат абыйлары кебек батыр, кыю булып, туган илебезне яратып үсүләрен теләде. Татар теле һәм әдәбиятыннан белем биргән укытучысы Гөлинә Вилданова да Илнур турында күңелләрне нечкәртерлек җылы сүзләр әйтте, ихлас теләкләрен җиткерде. Укучылар солдат абыйлары сөйләгәннәрне зур игътибар һәм хөрмәт белән тыңладылар, үзләрен кызыксындырган сорауларын бирделәр.