Сугыш тәмамлануны санаучы еллар саны арткан саен, арабызда әлеге Бөек Җиңүне якынайткан сугыш ветераннары, тыл ветераннары саны кими бара. Кызганычка каршы, авылда сугыш ветераннары калмады. Әмма район җитәкчелеге фронтка Җиңү көнен якынайтырга ярдәм итеп лаеклы өлеш керткән тыл хезмәтчәннәрен онытмый.

  Бөек Җиңү бәйрәме алдыннан , Россиянең  һәм Татарстанның  барлык төбәкләрендәге кебек  үк, Алимов Зариф исемендәге Яңа Кәкерле төп гомуми белем бирү мәктәбендә дә сугыш чорының авырлыкларын үз җилкәләрендә күтәргән тол хатыннар һәм тыл хезмәтчәннәре белән очрашу үтте. Очрашуга шулай ук махсус хәрби операциядән кыска вакытлы ялга кайткан авылдаш егетебез Әхмәтҗанов Илнурны да чакырдык. Бәйрәм тантанасына Татарстан Республикасы Чүпрәле муниципаль районында Татарстан Республикасы авыл хуҗалыгы һәм азык-төлек министрлыгының Авыл хуҗалыгы һәм азык-төлек идарәсе җитәкчесе Халитов Тәлгать Әхмәтсафа улы, Яңа Ишле авыл җирлеге башлыгы Мөхәммәтҗанов Радик Усман улы килде. Алар үзләренең чыгышларында изге теләкләрен һәм чиксез рәхмәтләрен әйттеләр, зур бәйрәм- Бөек Җиңү көне белән котладылар.Татарстан Республикасы Рәисе һәм Чүпрәле муниципаль районы башлыгы исеменнән тол хатыннар һәм тыл хезмәтчәннәренең һәркайсына чәчәкләр, котлау открыткалары һәм бүләкләр тапшырдылар, түшләрен георгий тасмасы белән бизәделәр. Батыр егетебез Илнурга, аның әти- әнисенә аерым рәхмәт сүзләре әйтеп, тиз арада исән- имин килеш бөтенләйгә әйләнеп кайтуын теләделәр. Мәктәп директоры Абдрахманов Шамил Мөбәрәкҗан улы үзенең чыгышында авылдашлары, аларның тиңсез хезмәте һәм батырлыгы белән горурлануын белдерде. Илнурга, әнисе Алсуга мәктәп коллективы исеменнән бүләкләр тапшырды. Ул үзенең сүзен: “Сугыш уты белән үрелгән язмышлар беркемне дә битараф калдырмый, тыныч тормыш өчен күп көч куйган ветераннарга рәхмәтебез чиксез! Илдә тынычлык булсын!”- дип тәмамлады.

   Очрашуның икенче өлеше мул итеп әзерләнгән табын артында үтте. Бәйрәмгә килүче авылдашлар хөкүмәтебез һәм район җитәкчеләренә, авыл җирлеге башлыгы Р.У.Мөхәммәтҗановка, мәктәп директоры Ш.М.Абдрахмановка, мәктәп коллективына, алар алдында тирән эчтәлекле шигырь һәм җырлар белән чыгыш ясаган укучыларга үзләренең җылы сүзләрен, чиксез рәхмәтләрен әйттеләр.