23 нче февраль - Ватанны саклаучылар көне. Ул - көч һәм түземлелек, мәрхәмәтлелек һәм туган җиреңә карата мәхәббәт бәйрәме. Әлеге бөек бәйрәмгә багышланган чаралар илебезнең һәрбер төбәгендә үткәрелә. Безнең мәктәптә дә "Ягез әле, егетләр!" исеме астында бәйрәм кичәсе үтте. Кичәгә Яңа Ишле авылы җирлеге башлыгы Радик Усман улы Мөхәммәтҗанов, хәзергесе вакытта махсус хәрби операциядә катнашучы егетләребезнең әти- әниләре Әхмәтҗановлар һәм Зиннатуллиннар да чакырылдылар. Алар үзләренең чыгышларында мәктәп коллективына рәхмәтләрен әйттеләр һәм илдә тынычлык булуын теләделәр. Укучылар исә төрле спорт уеннарында көч сынаштылар. Соңыннан Советлар Союзы Герое Алимов Зариф Закир улы бюстына венок куелды.