Туган тел... Һәркем өчен дә газиз сүз бу. Чөнки иң кадерле, бернәрсә белән дә алыштырылмый торган “әни”, “әти”, ”әби”, “бабай” сүзләрен башлап туган телдә әйтәбез. Туган үскән ил-җирнең якынлыгын, Ватанның газизлеген без туган тел ярдәмендә тойганбыз. Татар теле –ЮНЕСКО тарафыннан бөтендөнья халыкара аралашу теле дип саналган 14 телнең берсе. Бу – туган телебез белән горурланырлык мөһим фактор. Шушы бәйрәм уңаеннан мәктәбебездә, туган телебезгә карата мәхәббәт, горурлык хисләре тәрбияләүне максат итеп, «Туган телем- газиз телем» дип аталган чара үткәрелде. Укучылар укытучылар белән бергәләп туган телебез турында  рус һәм татар, чуаш һәм ингуш телләрендә  матур итеп әңгәмә кордылар,  шигырьләр сөйләделәр һәм төрле уеннарда катнаштылар. «Мәкаль әйтәм, дәвам ит», «Уйла һәм әйт» уеннары,  аеруча да кызыклы булды.
Чарада мәктәп директоры Абдрахманов Шамил Мөбәрәкҗан улының туган тел турында  ясаган чыгышы, баянда «Туган тел»не уйнавы һәм аны бергәләп башкару һәркемнең күңеленә хуш килде. Соңыннан Халыкара туган тел көненә багышланган видеофильм күрсәтелде.               Туган телебезне саклау - бүген һәммәбез алдында  торган иң зур бурычларның берсе. Туган телгә бер генә көн түгел, бөтен гомер бирелергә тиеш. Безнең тел үле тел түгел ул. Ул - яшәү теле. Без шул телдә уйларга, аңларга, сөйләшергә тиешбез.