1989 елның 15 февралендә  совет гаскәрләренең соңгы сугышчылары Әфганстан җиреннән чыгарылды, һәм бу көн илебез тарихына мәңгелеккә кереп калды. Быел шушы тарихи вакыйгага 34 ел тулды.
Әфганстан сугышы безнең авылны да читләтеп үтмәде. Авылыбызның 10 егете- Хайретдинов Мирфан, Хайруллин Газинур, Махмутов Илдус, Сафин Шәүкәт, Хайруллов Альберт, Хайруллин Илдар, Садыков Илдар, Сафин Зөфәр, Ахметзянов Ханиф, Залялетдинов Ринат- әфган сугышы ветераннары. Әфганстанда хезмәт  итеп исән-сау әйләнеп кайткан Хайруллин Газинур, Хайруллов Альберт инде  мәңгелек йортта.  Ә калган солдатларыбыз исән-сау илнең төрле почмакларында яшәп яталар. Аларны “әфганчылар”, “ әфган егетләре”  дип атыйбыз. Тикмәгә генә шулай  әйтмиләр. Чөнки алар туган илгә кайткач та  “әфган  егетләре”  булып калдылар. Алар  утны-суны кичеп, язмышларына төшкән авырлыкларны, сынауларны бергә җиңеп чыгып,  биредә дә бер-берсе белән элемтәне өзмиләр. Мәктәптә үткәрелгән чараларда актив катнашып, үзләренең хәләл көчләре белән тапкан малларыннан өлеш чыгарып, ел саен укучыларга бүләкләр ясыйлар. Мәктәптә үткәрелгән "Әфганстан- йөрәк ярасы" исемле  бүгенге чарада әфган сугышы ветераны Махмутов Илдус үзенең сугышчан дуслары, авыр сугыш юллары  турында сөйләде, сорауларга җавап бирде. Ул шушы сугыш чорын искә алып, укучыларны һәм мәктәп коллективын солдат боткасы белән сыйлады.Чарада Яңа Ишле авыл җирлеге башлыгы Радик Усман улы Мөхәммәтҗанов катнашты.