Бүген мәктәбебездә,  хәрби- патриотик айлык кысаларында, Ватанны саклаучылар көненә багышланган " Ягез әле, егетләр!" уены үткәрелде. Укучылар ярыш вакытында үзләренең физик яктан нинди әзерлектә булуларын күрсәттеләр, җитезлектә, тапкырлыкта ярыштылар. Кичәдә әфган сугышында утлар- сулар кичеп зур батырлыклар күрсәткән авылдашларыбыз Илдус Нургали улы Махмутов белән Илдар Инар улы Садыков та катнашты. Мәктәп директоры Шамил Абдрахманов һәм хөрмәтле кунагыбыз Илдар Садыковның гармунда үзләре уйнап җырлаулары бәйрәмне тагын да ямьләндереп җибәрде. Кичәнең ахырында әфганчы авылдашларыбыз мәктәпкә һәм укучыларга Мактау грамоталары, истәлекле бүләкләр тапшырдылар. Соңыннан исә барлык укучыларны һәм мәктәп коллективын Солдат боткасы белән сыйладылар. Рәхмәт аларга! Киләчәктә әле тагын бик күп очрашулар, бәйрәмнәр оештырырга насыйп булсын!