25 нче май -  иң тантаналы һәм истәлекле көннәрнең берсе. Бүген илебез мәктәпләрендә чыгарылыш сыйныф укучылары өчен соңгы кыңгырау яңгырады.Соңгы кыңгырау ул  зур тормышка, олы дөньяга атлаган көннәрнең гаҗәп матур да, тынгысыз да, сокландыргыч та һәм авыр да булуын искәртеп тора кебек. Бу -  хушлашу тавышы.  

Безнең мәктәптә дә, нәкъ 9 ел элек   4 сабыйны, әниләре матур итеп киендереп, кулла­рына зур бәйләм чәчәкләр тоттырып,  бүгенгедәй җитәкләп, беренче сыйныфка алып килгән балалар өчен, Соңгы кыңгырау чыңлады. Инде алар бүген буй җиткән кызлар һәм егет булдылар. Алар янында әниләре кечкенә генә булып калганнар. Тормыш юлларында чыгарылыш сыйныф укучыларына уңышлар телибез! Укучыларны котларга Буа элеваторы генераль директоры Хакимов Газинур Хабибулла улы, Чүпрәле районы авыл хуҗалыгы һәм азык –төлек идарәсе башлыгы Халитов Тәлгать Әхмәтсафа улы,  Яңа Ишле җирле үзидарә башлыгы Мухаметзянов Радик Усман улы килгән иде. Алар чыгарылыш сыйныф укучыларына имтиханнарны яхшы билгеләргә генә тапшыруларын теләделәр,  истәлеккә   бүләкләр дә тапшырдылар. Укучылар да аларга үзләренең җыр һәм шигырь юллары аша тирән рәхмәтләрен белдерделәр. Хәерле һәм уңышлы юллар сезгә, кадерле укучылар!