Бер очрашу - үзе бер  гомер бит,

                                                                  Очрашырга сәбәп табылсын.

                                                                  Бер- берләрен сагынышкан дуслар,

                                                                  Күрешергә дип, мәктәпкә агылсын.

    Районыбыз мәктәпләрендә бу көннәрдә шаулап- гөрләп студентлар белән очрашулар үтә. Безнең Алимов Зариф Закирович исемендәге Яңа Кәкерле төп гомуми белем  бирү мәктәбе дә бу чарага ныклап әзерләнде. Мәктәп укучылары алдан ук һәр студент белән элемтәгә чыгып, алар турында тулы мәгълүматлар тупладылар, шигырьләр, җырлар өйрәнделәр, стена газеталары чыгардылар.

    Бәйрәм шимбә көнне, ягъни 27 нче гыйнварда мәктәпнең актлар залында үтте. Очрашуга туган мәктәпләрен тәмамлап, хәзерге вакытта төрле уку йортларында  белем алучы студентлар килгән иде. Һәр студент үзе укыган уку йорты турында һәм  үзенең белгече буенча укуга карата булган  таләпләр белән таныштырды. Үзләренең буш вакытларын файдалы итеп үткәрүләре, ягъни төрле түгәрәкләргә йөрүләре, спорт ярышларында  катнашулары турында кызыклы һәм мавыктыргыч итеп сөйләп үттеләр.

     Казан дәүләт аграр университеты экономика факультетының  I  курс студенты Хакимова Инзилә , алдынгы студент буларак, Россия  Федерациясе Президенты  В.В.Путин  белән очрашу бәхетенә дә ирешә.

     Бәйрәм җыр- бию, уен- ярышлар  белән бергә үрелеп барды. Бу очрашу укучылар һәм студентларда бары җылы хисләр, онытылмас хатирәләр генә калдырды.