Тирә - якка хуш ис таратып, бар дөньяны акка төреп алмагачлар чәчәктә утыра. Шомырт һәм сириннәрнең  исеннән башлар әйләнә. Табигатьнең иң матур, иң гүзәл мәле. Тирә- яктагы яшеллектән, гүзәллектән  күзләр камаша.

Без, Алимов Зариф Закирович исемендәге   Яңа Кәкерле  төп гомуми белем бирү мәктәбе коллективы, укучылар,  табигатьнең шушы матурлыгы белән хозурланып кына калмыйча, аны саклау һәм яклау буенча төрле эшләр башкарабыз.  Бу эшләрне башлап җибәрүдә  мәктәп директоры  Шамил Мөбарәкҗан улы Абдрахманов һәм биология укытучысы Сергей Николаевич Никитиннар зур тырышлык куйдылар.

 Тирә- якны яшелләндерү эшен  алдагы еллардан  ук  башкарып килсәк тә, Экология елы кысаларында  аны  тагын да киңрәк җәелдереп җибәрергә булдык.

 Иң элек, бакчабыз түренә  нарат һәм пирамидаль тирәк үсентеләрен утыртып, үзебезнең питомнигыбызны булдырдык. Ул матур итеп үсеп китте, ләкин безнең хыялыбыз зурдан иде. Яңа Ишле авылы җирлеге башлыгы  Радик Усман улы Мухаметзянов ярдәме белән 80 гә якын нарат үсентеләрен кайтарттык. Хыялыбыз  мәктәптә “Җиңүчеләр аллеясы”  булдыру иде.  Үткән язда утыртылган  75 нарат үсентесе, безне сөендереп, яшелләнеп үсеп китте.  Без хыялыбызны тормышка ашырырга булдык. Җиңү бәйрәме көнендә үзебезнең хыялыбызны авыл  халкына һәм кайткан кунакларга җиткердек. Алар бик теләп,  Бөек Ватан сугышында катнашкан бабалары, әтиләре, туганнары хөрмәтенә бик теләп агачлар утыртуда катнашырга  булдылар. Бу урынга  көзен  75 данә тирәк утыртылган иде  инде һәм  быел да бу изге эшне дәвам иттердек.

 Беренчеләрдән булып, Бөек Җиңүнең 72 еллыгын билгеләп үткән көннәрдә авылдашыбыз Татарстанның халык артисты ИлСаф, мәктәбебезнең даими  иганәтчесе ,авылыбызның район советы депутаты Буа элеваторы генераль директоры Хакимов Газинур Хабибулла улы һәм Яңа Ишле җирлеге башлыгы  Радик Усман улы Мухаметзянов үзенең бабалары хөрмәтенә пирамидаль тирәк утырттылар  һәм киләчәктә даими рәвештә аны тәрбияләп үстерергә  сүз бирделәр. Үз чиратында,  алда утыртылганнарга өстәп,  укучы һәм укытучылар  белән берлектә, авыл халкы да үз исемнәре белән  атап  куак утыртырга теләделәр. Шулай итеп, мәктәбебезнең иң матур урынында “Җиңүчеләр аллеясы”  барлыкка килде.Бу агач- куакларыбыз  сугышта  һәлак булган авылдашларыбыз рухына салават әйтеп үсеп утырсыннар иде.Киләчәктә  аллеябыз  зураер, төз наратлар, яшел шәл ябынган тирәкләр һәркемне үзенә җәлеп итеп торыр дигән өметтә калабыз.